D' Alice vo Lieschtel meint...

S het halt doch e mänge Vorteil, s Altwärde. Zum Byschpiil d Vergässligkeit: Was eim nit passt, das vergisst men eifach – s Zahligsdatum vo de Stüüre oder vo de Versicherigsprämie oder s Datum vonere Familiezsämmekumft, wo me numme syni beschte Find teet aaträffe... Dernoo het me halt dr Termin vergässe uufzschrybe im Kaländer... Aber mängisch chaa eim au öppis Wichtigs unders Ys groote. Do einisch, won i au im Stedtli am Kummissiönle gsii bii, han i am glyche Tag drüümol müessen in glyche Lade, wil i immer wiider öppis z chaufe vergässe haa, zerscht dr Chnoblech, nohär d Eier, und won i scho fascht ufem Heiwäg gsii bii, isch s mer in Sinn choo, ass i jo au no Härdöpfel hätt selle haa. Won i bim dritte Mool d Ladetür uufmach, lach i e bitz verläge, i heig würklig e Hirni wien e Siib. Do meint dr Ladebsitzer, e nätte Maa im beschten Alter: "Jo, s isch nit grad aagnähm, wenn eim so öppis passiert, aber in Ihrem Alter isch das jo z begryfe, gälle Sy?"

Lislott Pfaff

*
* *