Totetanz

Tod, dy Tanz isch vil z verwäge,
Tod, eso will ich dii nit.
Tod, dää Tanz chunnt mir nit gläge,
Tod, eso mach ich nit mit.

Machsch e Tanzschritt ohni Takt,
zwirblisch blind in Höllestart
mit Muusig, wo wie Mässer hackt,
wo wie Gift in d Chnoche fahrt.

Tod, du gheysch jo uf e Ranze,
und d Sichle, wo dii sälber schloot,
haut der d Bei ab grad bim Tanze,
Tod – bisch jo dy eigene Tod.

Lislott Pfaff

*
* *